Laun sauðfjárbænda lækka um a.m.k. 56% og nánast öll sauðfjárbú rekin með tapi

| .

Oddný Steina Valsdóttir, formaður Landssamtaka sauðfjárbænda, sendi öllum alþingismönnum bréf í dag þar sem vakin er athygli á þeirri vá sem steðjar að íslenskri sauðfjárrækt vegna fyrirhugaðrar afurðaverðlækkunar í haust sem rekja má til ýmissa samverkandi utanaðkomandi þátta.

Í bréfinu vísar formaðurinn til minnisblaðs sem unnið var fyrir samtökin af Ráðgjafaþjónustu landbúnaðarins (RML) og byggir á skýrsluhaldi og reikningum fjölda sauðfjárbúa. Úr þeim má lesa að afkoma eftir hverja kind var í fyrra jákvæð fyrir afskriftir, fjármagnsliði og skatta um 1.180 kr. en verður neikvæð um 3.250 kr. í ár ef boðuð 35% afurðaverðslækkun haustsins gengur eftir.

Samanlagt heildartap íslenskra sauðfjárbænda vegna yfirvofandi lækkunar gæti orðið allt að 1.859 milljónir kr. Úr því sem komið er eigi bændur almennt ekki annan möguleika en að mæta þessari lækkun með öðru en að skerða eigin laun, enda þegar búið að leggja út nánast allan kostnað vegna lambakjötsframleiðslu haustsins.

Að jafnaði geti sauðfjárbændur því búist við a.m.k. 56% launalækkun. Hún verði þó í raun enn meiri þegar búið sé að taka tillit til afskrifta, fjármagnsliða og skatta. Afleiðingarnar geti orðið fjöldagjaldþrot til sveita með tilheyrandi byggðaröskun.

Fram kemur í bréfi formannsins að bændur hafi ítrekað bent á alvarleika þessarar stöðu en margra mánaða viðræður við stjórnvöld um bráðaaðgerðir hafi hins vegar litlu skilað. Landssamtök sauðfjárbænda telji því einsýnt að bændur og Alþingi taki höndum saman og bregðist við þessum bráðavanda án tafar.

Bréf_frá_formanni_Landssamtaka_sauðfjárbænda.pdf

RML_minnisblað_áhrif.pdf

 

Um 700 tonnum meira á lager en æskilegt væri

| .

Útlit er fyrir að um 1.300 tonn af lambakjöti verði til 1. september. Þetta er um 700 meira en æskilegt væri og í samræmi við það sem fram kom á vef Landssamtaka sauyðfjárbænda í lok júlí. Þetta jafngildir því nánast að mánaðarsala sé til á lager þegar nýtt kjöt kemur á markað. Oddný Steina Valsdóttir, formaður Landssamtaka sauðfjárbænda fór yfir stöðuna á Rás 1 í morgun. Smellið á myndina til að skoða betur. 

Markaðsráð hefur uppfyllt upplýsingaskyldu sína samkvæmt samkeppnislögum

| .

Framkvæmdastjóri Markaðsráðs kindakjöts sendi forstjóra Samkeppniseftirlitsins tölvubréf í dag þar sem því er komið skilmerkilega á framfæri að Markaðsráð situr ekki á neinum gögnum í tengslum við undanþágubeiðni sem ráðið sendi til eftirlitsins fyrr í sumar og hefur því uppfyllt upplýsingaskyldu sína í samræmi við 1. mgr. 19. gr. samkeppnislaga nr. 44/2005.

Þær upplýsingar sem Markaðsráð byggir undanþágubeiðni sína á eru opinberar og komnar frá Hagstofu Íslands, Matvælastofnun, Ráðgjafamiðstöð landbúnaðarins eða sambærilegum aðilum. Að öðru leyti er byggt á mati forystumanna bænda og sláturleyfishafa á stöðu greinarinnar og hugsanlegri atburðarás ef ekki verður brugðist við. 

Hér að neðan má lesa bréfið í heild sinni. 

Frá_Markaðsráði_kindakjöts_04082017.pdf

Fleiri fréttir

Vinsælustu fréttirnar